Trent pasi iu bashkua Realit: Jam i lumtur që do luaj me lojtarët e kësaj skuadre dhe jo kundër tyre

Lojtari i ri i Real Madridit, Trent-Alexander Arnold ka folur për herë të parë pasi iu bashkua klubit mbretëror.

Trent tha se shpreson se do të jetë në gjendje që ta përsëris suksesin e tij me Liverpoolin dhe t’u japë shumë asistime sulmuesve.

“U rrita duke parë Real Madridin të fitonte 3 Liga të Kampionëve. Nuk jam i panjohur me Real Madridin që fiton trofe. Kam folur disa herë me Xabin. I thashë se ishte një idhull i imi gjatë fëmijërisë, kështu që të punoj me të është një ëndërr e bërë realitet”, tha Trent në intervistë për media, shkruan Marca, transmeton Klankosova.tv.

Tutje, ai u shpreh i entuziazmuar me bashkimin te Reali, pasi tha se “vetëm një numër i vogël lojtarësh anglezë kanë luajtur për Real Madridin, është e veçantë të jesh pjesë e tij”.

“Do të jetë shumë e vështirë të fitoj Topin e Artë me lojtarët e kësaj skuadre. Jam thjesht i lumtur që do të luaj me ta dhe jo kundër tyre. Jam shumë i lumtur që jam këtu. Jam shumë me fat dhe krenar”.

“Nëse do të largohesha nga Liverpooli, do të ishte vetëm për Real Madridin. E di prej kohësh”, tha ai.