Tennessee: Trupi i trevjeçarit gjendet në valixhe, babai arrestohet për vrasje

Trupi i vogëlushit, Joseph Martinez, 3 vjeç, u gjet brenda një valixheje në një zonë të pyllëzuar në Memphis, Tennessee, të hënën, më 20 korrik, sipas një njoftimi të Policisë së Memphis dhe dokumenteve gjyqësore të siguruara nga revista PEOPLE.

Babai i tij, Saul Martinez, 22 vjeç, është arrestuar dhe përballet me disa akuza, përfshirë vrasje të shkallës së parë, në lidhje me vdekjen e të birit, transmeton Klankosova.tv.

Hetimet nisën të dielën, më 19 korrik, pasi nëna e Joseph raportoi zhdukjen e tij dhe u tha policëve se fëmija ishte parë për herë të fundit me të atin një ditë më parë.

Sipas dëshmisë së gjyshit të fëmijës, Octavio Martinez, Saul kishte hyrë në dhomën e tij rreth mesnatës së së shtunës, i kishte kërkuar para dhe kishte marrë çelësat e makinës pa leje. Octavio u tha hetuesve se e pa të birin duke tërhequr një valixhe të madhe, duke e vendosur në sediljen e përparme të makinës dhe më pas duke u larguar.

Disa orë më vonë, Saul u kthye, ia dorëzoi çelësat të atit dhe u largua sërish. Kur u kthye të hënën në mëngjes, familjarët e përballën me pyetje dhe, sipas autoriteteve, ai pranoi se kishte hedhur trupin e Joseph pranë lumit.

Hetuesit bëjnë me dije se Saul i çoi ata në një zonë të pyllëzuar pranë Wolf River Harbor, ku u tregoi vendin ku kishte lënë valixhen. Gjatë kontrollit, policia gjeti trupin e pajetë të 3-vjeçarit brenda saj.