Sulm izraelit afër Spitalit Al-Aqsa, vriten dy persona dhe plagosën dhjetëra të tjerë

Një sulm izraelit me dron mbi tendat që rrethonin Spitalin e Martirëve Al-Aqsa në Gaza qendrore vrau të paktën dy persona dhe plagosi dhjetëra të tjerë të dielën, tha një zëdhënës i spitalit për CNN.

Mijëra njerëz të zhvendosur janë strehuar në mjediset e spitalit, së bashku me disa ekipe gazetarësh që punojnë nga tendat në zonë.

Al-Aqsa është i vetmi objekt mjekësor funksional i mbetur në qytetin qendror të Deir al-Balah.

Videot e ngjarjeve, të shpërndara nga gazetarët, tregojnë panik teksa njerëzit vraponin për t’u mbrojtur nën mbeturinat fluturuese, ndërsa të tjerë nxituan drejt tendave që digjen për të ndihmuar të plagosurit dhe për të shuar zjarret e vogla.

Ushtria izraelite pretendoi në një deklaratë se një nga avionët e saj goditi një “qendër komanduese operacionale të Xhihadit Islamik dhe terroristët që vepronin nga oborri” i spitalit. Forcat e Mbrojtjes të Izraelit dhe Agjencia e Sigurisë së Izraelit nuk dhanë prova për të mbështetur këtë pretendim.

IDF tha se operacioni ishte planifikuar për “minimizimin e dëmit ndaj civilëve të papërfshirë” dhe për të shmangur dëmtimin e ndërtesës kryesore të spitalit.

Gazetari Usama Al-Kahlout i tha CNN se sulmi ishte “shënjestër e drejtpërdrejtë e tendave të gazetarëve”, të cilat janë të rrethuara nga tendat e njerëzve të zhvendosur në hyrjen e urgjencës të spitalit.

“Ne ishim ulur këtu të sigurt. Papritur, pluhuri e mbushi ajrin. Pashë përreth dhe pashë se çadra e fqinjit tonë ishte goditur. Ata të zhvendosur nuk kanë lidhje me askënd – njëri është mësues dhe tjetri është mjek që nuk është lidhur me ndonjë gjë”, tha për CNN Hamza al-Kurd, i cili është strehuar në zonë me familjen e tij, transmeton Klankosova.tv.

Videoja e xhiruar nga CNN tregon shkatërrimin e disa tendave dhe pajisjeve të gazetarëve.

Në pamjet, njerëzit shihen duke inspektuar tendat e dëmtuara dhe duke kaluar nëpër rrënojat e lyera me gjak për të shpëtuar atë që ka mbetur nga gjërat e tyre.