Studimi: Njerëzit lëshojnë gazra deri në 32 herë në ditë

Një studim i ri ka zbuluar se njerëzit mund të lëshojnë gazra shumë më shpesh sesa besohej më parë, dhe se kjo shifër rritet me moshën.

Sipas mjekëve, një i rritur i shëndetshëm zakonisht lëshon gazra rreth 5 deri në 15 herë në ditë. Por hulumtime të fundit nga Universiteti i Maryland-it tregojnë se numri real mund të jetë shumë më i lartë, duke arritur mesatarisht deri në 32 herë në ditë.

Në disa raste, pjesëmarrësit kanë raportuar vetëm 4 episode në ditë, ndërsa të tjerë kanë arritur deri në 59. Studiuesit theksojnë se dallimet janë të mëdha dhe varen nga individi.

Ekspertët shpjegojnë se prodhimi i gazrave është një proces normal i tretjes, i shkaktuar nga bakteret në zorrë që shpërbëjnë ushqimin dhe krijojnë gazra si hidrogjeni, metani dhe dioksidi i karbonit, shkruan Metro, transmeton Klankosova.tv.

Një pjesë e gazrave hyn në trup gjatë të ngrënit, pirjes apo të folurit, por zakonisht del përmes gromësirës ose jashtëqitjes së gazrave.

Sasia e tyre ndryshon nga dieta, bakteret e zorrëve dhe gjendja shëndetësore. Ushqimet e pasura me fibra si fasulet, thjerrëzat, drithërat e plota dhe perimet si brokoli, lulelakra dhe lakra janë ndër shkaktarët më të zakonshëm.

Sipas ekspertëve, kjo nuk është domosdoshmërisht shenjë e keqe, përkundrazi, tregon se sistemi tretës po funksionon normalisht.

Studimi tregon gjithashtu se me kalimin e moshës, tretja ngadalësohet, duke bërë që gazrat të krijohen dhe të mbeten më gjatë në zorrë. Ndryshimet në prodhimin e acidit të stomakut dhe ndjeshmëria ndaj ushqimeve të caktuara mund të rriten gjithashtu me moshën.

Gjithashtu, disa ilaçe dhe gjendje si sindroma e zorrës së irrituar mund të ndikojnë në rritjen e gazrave. Me kalimin e viteve, dobësimi i muskujve të traktit tretës mund ta bëjë edhe më të vështirë mbajtjen e tyre.