Statuja e zhdukur e qytetit shfaqet pas gati 30 vjetësh (VIDEO)

Një statujë që u zhduk nga Louisville të ShBA-së gati 30 vjet më parë, është kthyer në qytet nga një burrë që e mbante në oborrin e tij të pasmë.

David Greer tha se babai i tij punoi në një projekt rinovimi në vitin 1996 në Belvedere, një hapësirë e lartë ngjarjesh në qendër të qytetit Louisville, kur solli statujën në shtëpi.

“Babai tha se e hodhën anash dhe ai e pyeti nëse mund ta kishte, dhe ata thanë, sigurisht. Këtu filloi jetën në shtëpinë tonë”, tha Greer për WLKY-TV.

Statuja përshkruan perëndinë greke Pan duke luajtur një flaut.

“Unë nuk e dija se çfarë ishte. Dua të them, ishte vetëm ky djalë i vogël që luante një flaut”, tha motra e Greer, Sheri Eckl.

Ajo shtoi se vendosi të bënte disa kërkime në historinë e statujës në dhjetor dhe zbuloi se Departamenti i Arteve Publike të Louisville Metro kishte qenë në kërkim të veprës së artit, e cila u krijua nga artistja Charlotte Price.

“Jemi shumë të lumtur që e kemi kthyer”, tha Jessica Kincaid, drejtore e Zyrës së Arteve dhe Industrive Kreative të qytetit.

Kincaid tha se statuja është ende në gjendje të mirë pavarësisht nga gati tre dekada pa mirëmbajtjen e duhur dhe tani është duke u vlerësuar për qytetin. Ajo tha se qyteti do të vendosë së shpejti se ku do të vendoset statuja në fjalë.

Greer shtoi se ishte i lumtur që statuja të kthehej aty ku i takon.