Solidariteti ndërfetar: Gjini e Hoxha e bëjnë Nrecën me shtëpi (VIDEO)

Shtëpinë e vjetër e la pas. E me gjasë, edhe jetesën e vështirë.

Kjo pasi Prenk Nreca nga Pjetershani i Gjakovës të mërkurën hyri në shtëpinë e re. Atë ia ndërtoi Shoqata “Bereqeti”, raporton Klan Kosova.

Pesë djemtë e tij janë të parët që e bënë përhajër godinën dydhomëshe, e pastaj edhe mysafirët.

Mysafir e patën edhe kryetarin e Komunës së Gjakovës Ardian Gjini, që kontribuoi me 5 mijë euro, i cili çmoi mobilizimin që u bë rreth rastit të familjes Nreca.

Edhe nga Bashkësia Islame po ndihen të plotësuar me kontributin.

E hoxha që udhëhoqi punimet e shtëpisë, Abdurrahman Bejtullahu, falënderoi të gjithë për solidaritetin e treguar.

Vetë përfituesi, që e mban familjen e tij si punëtor krahu e i cili është baba vetëushqyes pasi gruaja iu divorcua, u emocionua për ndihmën që iu dha.

‘Bereqeti’ e ndihmoi Nrecën edhe me pako ushqimore. /Klankosova.tv