ShBA: Vrau katër persona, 16-vjeçari dënohet me burgim të përjetshëm

Një gjykatë në shtetin amerikan të Georgias ka dënuar me burgim të përjetshëm 16-vjeçarin Colt Gray për sulmin e armatosur që kreu në shkollën e tij në shtator të vitit 2024, ku mbetën të vrarë katër persona.

Gjykata vendosi që ai të vuajë dënimin pa mundësi lirimi të parakohshëm, pasi u gjykua sipas legjislacionit për të rritur, pavarësisht moshës së tij.

Gjatë shpalljes së aktgjykimit, gjyqtari Nicholas Primm deklaroi se sulmi nuk ishte kryer për shkak të urrejtjes ndaj viktimave, por me qëllim që i riu të fitonte famë, shkruan gazeta gjermane Bild, transmeton Klankosova.tv.

“Ti nuk e bëre këtë nga urrejtja. Madje nuk njihje pothuajse askënd në atë shkollë. E bëre sepse doje famën që sjell një akt i tillë”, tha gjyqtari.

Sulmi që tronditi SHBA-në

Masakra ndodhi në shtator të vitit 2024 në shkollën e mesme Apalachee High School, në qytetin Winder të shtetit të Xhorxhias. Atëherë, Colt Gray vrau dy bashkëmoshatarë 14-vjeçarë dhe dy mësues, ndërsa plagosi edhe nëntë persona të tjerë.

Ky ishte një tjetër rast tragjik që riktheu debatin për sigurinë në shkollat amerikane dhe qasjen ndaj armëve të zjarrit.

Edhe babai u shpall fajtor

Në një proces të veçantë gjyqësor, edhe babai i të dënuarit, Colin Gray, u shpall fajtor për vrasje nga pakujdesia dhe akuza të tjera të lidhura me ngjarjen.

Sipas prokurorisë, ai ia kishte blerë djalit pushkën gjysmëautomatike si dhuratë për Krishtlindjet e vitit 2023, ndonëse autoritetet kishin marrë më herët sinjalizime se djali kishte bërë kërcënime në internet për një sulm në shkollë.

Rastet kur prindërit mbahen penalisht përgjegjës për krimet e fëmijëve të tyre janë shumë të rralla në Shtetet e Bashkuara.

Gjyqtari: Prindërit të kanë dështuar, por përgjegjësia mbetet e jotja

Gjatë seancës, gjyqtari Primm foli edhe për rrethanat familjare të autorit. Sipas raportimeve mediatore, babai ishte i apasionuar pas armëve, ndërsa nëna, Marcee Gray, kishte një histori të gjatë problemesh me ligjin, përfshirë dhunë në familje, vepra penale të lidhura me drogën dhe alkoolin, dëmtim prone dhe mashtrim.

“Prindërit e tu të kanë lënë në baltë. Edhe pjesa tjetër e familjes të ka dështuar. Por kjo nuk të çliron nga përgjegjësia për zgjedhjet që ke bërë, për njerëzit që ke marrë si shembull dhe për personin që je bërë”, deklaroi gjyqtari.

Sulmet në shkolla mbeten një problem serioz

Shtetet e Bashkuara vazhdojnë të përballen me sulme të shpeshta me armë zjarri në shkolla. Rreth një e treta e të rriturve në vend zotërojnë armë, ndërsa ligjet për blerjen dhe posedimin e armëve gjysmëautomatike mbeten relativisht të lehta në shumë shtete, duke nxitur vazhdimisht debate për nevojën e reformimit të tyre.