ShBA minimizon rritjen e çmimeve: Vetëm ndërprerje të përkohshme në tregun e naftës

Shtëpia e Bardhë ka minimizuar shqetësimet për rritjen e çmimeve të naftës dhe karburanteve pas përshkallëzimit të tensioneve me Iranin, duke theksuar se çdo ndikim në treg do të jetë i përkohshëm.

Sekretarja e Shtypit e Shtëpisë së Bardhë, Karoline Leavitt, deklaroi se mund të ketë “ndërprerje të përkohshme në tregun e naftës”, por shtoi se politikat energjetike të presidentit Donald Trump dhe “veprimet e tij të shpejta” kanë parandaluar “rritje masive të çmimit të naftës, për të cilat shumë kishin paralajmëruar”.

Leavitt vlerësoi masat e administratës amerikane për stabilizimin e tregut të energjisë, duke përmendur lirimin e rezervave nga Rezerva Strategjike e Naftës, pezullimin e përkohshëm të zbatimit të Jones Act dhe përdorimin e Ligjit për Prodhimin e Mbrojtjes (Defense Production Act) për rritjen e prodhimit të naftës në Kaliforni.

Sipas saj, këto masa kanë ndihmuar në krijimin e “një tregu relativisht të qëndrueshëm të naftës”, shkruan CNN, përcjell Klankosova.tv.

Sipas të dhënave të AAA, çmimi mesatar kombëtar i një galoni benzine në Shtetet e Bashkuara është aktualisht 3.94 dollarë. Çmimet kanë filluar të rriten sërish ditët e fundit, pasi armëpushimi mes SHBA-së dhe Iranit dështoi. Për krahasim, në të njëjtën periudhë të vitit të kaluar, çmimi mesatar ishte 3.16 dollarë për gallon.

Leavitt theksoi se prioriteti kryesor i presidentit Trump mbetet garantimi që Irani të mos sigurojë kurrë armë bërthamore.

Megjithatë, strategjia e administratës po përballet me skepticizëm nga opinioni publik.

Një sondazh i ri i The Washington Post dhe Ipsos, i publikuar të enjten, tregon se vetëm 33 për qind e amerikanëve e miratojnë mënyrën se si Trump po e menaxhon ekonominë, ndërsa vetëm 29 për qind mbështesin mënyrën se si ai po e trajton konfliktin me Iranin.