Shakira në gjykatë për “La Bicicleta” – akuzohet për plagjiaturë

Këngëtarët Shakira dhe Carlos Vives janë paraqitur në një gjykatë në Madrid për t’iu përgjigjur akuzave për plagjiaturë në këngën “La Bicicleta”.

Shakira buzëqeshi derisa hynte në gjykatë në qendër të Madridit të mërkurën. Ajo nuk iu përgjigj pyetjeve të gazetarëve, njofton Klan Kosova.

Shakira dhe Vives kanë hedhur poshtë pretendimet e këngëtarit Livan Rafael Castellanos se ritmi, teksti dhe melodia e “La Bicicleta” është e ngjashme me këngën e tij “Yo te quiero tanto”, të publikuar në vitin 1997.

Ajo i tha gjyqtarit se kënga e Castellanos nuk është aspak si “La Bicicleta”. Sipas saj melodia është ndryshe, muzika është e ndryshme, lënda është e ndryshme”.

“Kënga ime flet për atdheun tim, kjo është një përshëndetje për atdheun tim Barranquilla, Kolumbi, jo për Kubën “, tha Shakira, sipas Europa Press.

Kënga “La Bicicleta” ka marrë tri çmimet Grammy më të mëdha Latino për vitin 2016.