Seanca e sotme e Kuvendit përfundon pas mbi 10 orëve

Të hënën u mbajt seanca plenare e Kuvendit të Kosovës, ku u shqyrtua Projekt-Rezoluta për katër vjet qeverisje, të cilën e arsyetoi kryetari i Grupit Parlamentar të AAK-së, Besnik Tahiri.

Seanca e cila zgjati mbi 10 orë u kryesua nga nënkryetarja Saranda Bogujevci, raporton Klankosova.tv.

Tahiri i cili cilësoi qeverisjen aktuale si një listë dëshirash dhe pa realizime konkrete, e akuzoi atë për një sërë skandalesh që sipas tij e karakterizojnë ekzekutivin.

Ai përmendi disa “mangësi” në realizimin e premtimeve qeveritare, si “blerja e energjisë, falja e borxhit të ujit, problemet në RTK, sanksionet e Bashkimit Evropian,  dështimin e realizimit të projekteve për ndihmën sociale dhe zhvillimin e infrastrukturës, duke përfshirë mungesën e çerdheve dhe sigurimit shëndetësor, sigurimin e banesave për qiftet e reja etj”.

Kryeministri Albin Kurti, në fjalën e tij potencoi ato që ai i cilëson si arritjet të shumta të qeverisë në këtë periudhë, duke i përmendur kronologjikisht ato.

Ai tha se qeveria ka bërë ndryshime të rëndësishme që kanë prekur drejtpërdrejt jetën e qytetarëve dhe kanë krijuar mundësi për një të ardhme më të mirë për të gjithë.

Shefi i ekzekutivit përmendi disa nga arritjet kryesore të ekonomisë, duke përfshirë rritjen prej 6.36% të Produktit të Brendshëm Vendor, uljen e borxhit publik dhe papunësisë, si dhe një rritje të punësimit me 80,000 qytetarë të tjerë.

Ai gjithashtu theksoi rritjen e shpenzimeve kapitale, krijimin e mundësive për punësimin e grave, rritjen e pagës minimale në 350 euro dhe zhvillimin e sektorit privat.

“Shpenzimet kapitale janë rritur krahasuar me vitin paraprak, ndërsa 14,000 të rinj janë punësuar përmes platformës Superpuna”.

Për sa i përket politikës së jashtme, Kurti theksoi avancimin e Kosovës në organizata ndërkombëtare, përfshirë avancimin e statusit të Kosovës në Asamblenë Parlamentare të Këshillit të Evropës dhe aplikimin për anëtarësim në Bashkimin Evropian.

Seanca plenare vazhdoi me diskutime të shumta nga deputetët, të cilët paraqitën qëndrimet e tyre lidhur me punën e qeverisë gjatë këtij mandati.

Deputetët, në varësi të përcaktimeve politike, në pozitë apo në opozitë, vlerësuan lart qeverisjen aktuale, përkatësisht, e akuzuan atë për dështime.

Në përmbyllje të seancës, iniciuesi i saj, deputeti Besnik Tahiri tha se gjatë kësaj seance u është bërë një mbrojtje e paprecedentë aferave qeveritare dhe se po ashtu, sipas tij, pati një sulm të paprecedentë ndaj sistemit të drejtësisë. Ai shtoi se kishte ikje të ballafaqimit për secilën temë që u ngrit në debat.

Në mungesë të kuorumit kryesuesja Bogujevci tha se projektrezoluta nuk mund të hidhet në votim dhe për rrjedhojë votimi i saj do të bëhet në një nga seancat e radhës.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.