Saga e pronës në Ortakoll: Gjykata sërish në favor të serbit, paralajmërohen padi të reja (VIDEO)

Kontesti shumëvjeçar për një pronë në lagjen Ortakoll të Prizrenit vazhdon edhe pas vendimit të fundit të Gjykatës Themelore në Prizren, e cila për herë të tretë ka vendosur në favor të serbit, Zoran Gariq.

Në këtë rast janë të përfshirë tre persona: Zoran Gariq, Faim Hoti dhe Engjull Qollaku të cilët pretendojnë të drejta mbi të njëjtën pronë, raporton Kiks Kosova.

Gariq konsiderohet pronar i tokës që nga vitet ’90, ndërsa dy prizrenas pretendojnë se e kanë blerë atë në periudha të ndryshme.

Faim Hoti thotë se ngastrën e ka blerë përmes ish-drejtorit të Kadastrit të asaj kohe, Kadri Ukimeri, ndërsa Engjull Qollaku pretendon se pronën e ka blerë menjëherë pas luftës nga vetë Gariqi, me ndërmjetësimin e Adem Nrecajt.

Gjykata Themelore në Prizren më 16 shkurt 2026 ka aprovuar kërkesëpadinë e Gariqit dhe ka obliguar Hotin që brenda 15 ditësh nga pranimi i aktgjykimit ta lirojë pronën dhe t’ia dorëzojë atë paditësit.

Po ashtu, gjykata ka refuzuar si të pabazuar kundërpadinë e Hotit, me të cilën ai kërkonte të njihej si pronar i ngastrës.

Rasti ka qenë disa herë në rigjykim, pasi Gjykata e Apelit kishte rrëzuar dy aktgjykime të mëparshme të shkallës së parë.

Pas vendimit të fundit, pala e Gariqit paralajmëron edhe hapa të rinj ligjorë.

Derisa mbrojtësi i të paditurit ka treguar se kanë parashtruar ankesë nga aktgjykimi të Themelores.

Ky rast është trajtuar nga Kiks Kosova, kronikat e të cilit mund t’i gjeni në vijim: