Rivalë në lojë, por miqësorë në tifozëri (VIDEO)

Kishte javë që priste mjeshtrin t’ia ndreqte veturën.

Kjo pritje ra sebep për Kushtrim Reshitajn që bashkë me Gazmend Sylën ta nisnin një aventurë të përbashkët që i endte në të dyja anët e Kosovës – dy herë në Therandën  e Reshitajt, e dy herë në Mitrovicën e Sylës.

Syla ngiste  për në destinacionin e njëjtë ndonëse me bashkudhëtarin e tij dëshirat i kishin të ndryshme.

Ata i përcollën të katër përballjet e klubeve të zemrës në basketboll me një dashamirësi dhe sportivitet që rridhte në kuadër të një fryme të re të tifozërisë sportive në Kosovë. Të tifozërisë së filtruar nga sharjet e ndërsjella mes grupeve të tifozëve, e sa më larg edhe prej dhunës fizike që shpesh herë e ka zbehur atmosferën sportive në vend, kryesisht në futboll e basketboll.

Klubi suharekas, Golden Eagle Ylli, e mbrojti titullin kampion, mirëpo Trepça la tifozët e vet me entuziazmin se vite të mira janë përpara për njërin prej klubeve me historinë më të bujshme në basketbollin kosovar.

Golden Eagle Ylli i mori dy fitore në Mitrovicë, e Trepça një në Therandë – në paqe. Misioni i të dyja klubeve dhe i të dyja tifozërive, Xhebrailave dhe Torcidës, kësaj radhe dukej të ishte përtej basketbollit.

Mision ishte ta dëshmonin që tifozëria mund të ishte po aq e fortë edhe si brohoritje e dëlirur nga fyerjet; se pasioni në parket e në tribuna mund të ekzistonte edhe duke e konsideruar lojën si lojë – e jo si një luftë të njëmendtë.