Qindra protestues sfidojnë ndalimin e policisë, marshojnë drejt Parlamentit në Indi

Qindra mbështetës të lëvizjes rinore “Cockroach Janta Party” u mblodhën në kryeqytetin indian për të marshuar drejt Parlamentit, pavarësisht se policia nuk kishte dhënë leje për protestën.

Demonstruesit kërkojnë dorëheqjen e ministrit të Arsimit, Dharmendra Pradhan, pas skandalit të rrjedhjes së testeve të pranimit në fakultetet e mjekësisë, që preku mbi dy milionë studentë.

Autoritetet vendosën masa të rrepta sigurie pranë Parlamentit, ndërsa protestuesit brohoritën slogane kundër ministrit të Arsimit dhe kryeministrit Narendra Modi.

Lëvizja fitoi vrull pasi aktivisti Sonam Wangchuk, i cili ishte në grevë urie, u dërgua me forcë në spital nga policia. Wangchuk deklaroi se do ta ndërpresë grevën vetëm nëse qeveria merr përgjegjësi për skandalet në sistemin arsimor ose nëse deputetët garantojnë se kërkesat e protestuesve do të shqyrtohen në Parlament.

Analistët e shohin lëvizjen si sfidën më të madhe publike për qeverinë e Narendra Modit gjatë mandatit të tij të tretë, ndërsa pakënaqësia e të rinjve lidhet edhe me papunësinë dhe korrupsionin në sistemin e provimeve.