Palestinezët e zhvendosur largohen nga spitali në Gazë, pas javësh izolimi nga luftimet

Palestinezët kanë nisur evakuimin e spitalit kryesor në qytetin jugor të Gazës, Khan Younis, sipas videove të shpërndara nga mjekët të mërkurën. Javë luftimesh të ashpra kishin izoluar objektin mjekësor dhe kishin marrë jetën e disa njerëzve brenda tij.

Lufta midis Izraelit dhe Hamasit, tashmë në muajin e pestë, ka shkatërruar sektorin shëndetësor të Gazës, me më pak se gjysmën e spitaleve të saj që funksionojnë edhe pjesërisht, ndërsa dhjetëra njerëz vriten dhe plagosen në bombardimet e përditshme. Izraeli akuzon militantët se përdorin spitale dhe ndërtesa të tjera civile si mbulesë, raporton AP, transmeton Klan Kosova.

Khan Younis është objektivi kryesor i një ofensive në terren që Izraeli ka thënë se së shpejti do të zgjerohet në qytetin më jugor të Gazës, Rafah. Rreth 1.4 milionë njerëz – mbi gjysma e popullsisë së territorit – janë të grumbulluar në kampe çadrash dhe apartamente të tejmbushura dhe strehimore në qytetin në kufirin me Egjiptin.

Videot e postuara treguan dhjetëra palestinezë që mbanin gjërat e tyre në thasë dhe dilnin nga kompleksi i spitalit Nasser. Një mjek me uniformë të gjelbër spitalore eci përpara turmës, disa prej të cilëve mbanin flamuj të bardhë.