Pahor lobon për AKS, Osmani preket (VIDEO)

Presidenti i Sllovenisë, Borut Pahor, të mërkurën qëndroi në një vizitë disa orë në Kosovë.

Ai u prit nga presidentja Vjosa Osmani, që nga nikoqiri mori ftesën për pjesëmarrje në Samitin Brdo-Brijuni që mbahet më 12 shtator.

Nga Prishtina, Pahor vendosi t’i përgjigjet homologut serb, Aleksandar Vuçiq, i cili të shtunën gjatë takimit me Pahor në Beograd, tha se Sllovenia nuk e respekton integritetin territorial të Serbisë, e Rusia , po.

“Ju them të gjithëve sa i përket Kosovës, Sllovenia e Serbia kanë qëndrime të ndryshme. Ne e kemi pranuar shtetin e Kosovës, Serbia, jo. Deklarata e tillë ishte e papranueshme dhe tendencioze. Por është ripërsëritje e dallimeve që ekzistojnë. Duhet të jetohet me këto deklarata dhe ne duhet të koncentrohemi te ajo që nga bashkon e jo ajo që na ndan”, tha Pahor në konferencë me presidenten Osmani.

Ndërkohë një çështje që dyshja presidenciale s’pajtohen është themelimi i Asociacionit të Komunave me Shumicë Serbe.

“I thashë kolegës e mikës sime, se unë sikur që mbështes të drejtën ligjore që vjen nga Gjykata Kushtetuese, po ashtu pres që të gjendet një zgjidhje për zbatimin e ujdisë së Asociacionit. Nuk e di nëse kryetarja do të na flas për ndonjë alternativë por derisa se kemi një alternativë pra propozim nga ana tjetër vlen marrëveshja e arritur më parë”, shtoi kryetari slloven.

Nga ana e saj kryetarja e Kosovës, theksoi se shteti s’mund të krijoj strukturë një-etnike sepse bie ndesh me Kushtetutën e Kosovës.

Gjatë takimit nikoqirja i ka kërkuar mysafirit përkrahje për anëtarësim të Kosovës në strukturat euro-atlantike dhe liberalizimin e vizave, që Pahor thotë se duhet të ndodh sa më shpejtë.

Presidenti i Sllovenisë, gjatë qëndrimit disa orësh në Prishtinë, mbajti takim edhe me kryeministrin Albin Kurti.