Më 28 shkurt në Athinë anulohen fluturimet për 24 orë

Fluturimet dhe shërbimet e tjera të udhëtimit në aeroportin e Athinës në Greqi do të ndërpriten të premten më 28 shkurt, pasi kontrollorët e trafikut ajror dhe punonjësit e tjerë të transportit do t’i bashkohen një greve të përgjithshme 24 orëshe mbarëkombëtare, që do të çojë në anulimin e të gjitha fluturimeve komerciale që hyjnë dhe dalin nga aeroporti “Eleftherios Venizelos” i Athinës.

Greva do të mbahet nga sindikatat për të shënuar përvjetorin e dytë të aksidentit hekurudhor Tempi në Greqi, i cili çoi në vdekjen e 57 personave. Sindikatat thonë se po “kërkojnë drejtësi” për këto viktima.

Në këtë aeroport zakonisht realizohen mbi 400 fluturime çdo ditë, është më i madhi dhe më i ngarkuari në Greqi, si dhe porta kryesore ndërkombëtare e vendit. Ai gjithashtu shërben si një qendër e rëndësishme për shumë linja ajrore evropiane dhe ndërkombëtare.

Fluturimet esenciale, përfshirë transportin qeveritar, evakuimet mjekësore, aeroplanët ushtarakë, shpërndarjet e ndihmave humanitare dhe misionet e kërkim-shpëtimit, nuk do të ndërpriten.

Udhëtarët këshillohen të kontrollojnë statusin e fluturimeve të tyre dhe të kërkojnë informacion mbi mundësinë e rimbursimeve apo ndryshimeve të udhëtimit.