Mbyllja e institucioneve paralele, serbët edhe sot në protestë

Punonjësit e komunës paralele në Mitrovicë të Veriut kanë protestuar edhe sot.

Serbët atje protestuan edhe të hënën pasi autoritetet e Kosovës mbyllën pesë institucione paralele.

Më 30 gusht në një aksion të policisë u mbyllën këto pesë institucione.

Ministri i Administrimit të Pushtetit Lokal, Elbert Krasniqi  njoftoi atë ditë se komunat paralele të cilat nuk do të operojnë më janë “Qarku i Mitrovicës së Kosovës,  Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit”, transmeton Klankosova.tv.

Krasniqi njofton mbylljen e pesë institucioneve paralele ilegale në veri

Tubimi i së hënës dhe së martës vijnë dy ditë pasi në institucionet paralele serbe u vendosën pllaka të ministrive të Qeverisë së Kosovës.

Shtatë komuna të tjera paralele serbe në pjesë të tjera të vendit u patën mbyllur gjatë muajit prill.