Mbi 30 të vdekur në kampin e refugjatëve në Kongo, dyshime për përhapje të Ebolës

Që nga fillimi i majit, të paktën 30 persona kanë vdekur në një kamp për civilë të zhvendosur në verilindje të Kongos, një shkallë vdekshmërie që, sipas zyrtarëve të kampit, është e paprecedentë.

Disa nga rastet janë konfirmuar si të shkaktuara nga Ebola, duke ngritur shqetësime se sëmundja mund të jetë duke u përhapur me shpejtësi në zonë, shkruan Reuters, transmeton Klankosova.tv.

Nuk ka qenë e mundur të konfirmohen shkaqet e të gjitha vdekjeve, pasi pacientët ose familjarët e tyre në kampin Kigonze në Bunia-epiqendra e shpërthimit të Ebolës në Republikën Demokratike të Kongos-kanë refuzuar testimin deri të enjten, sipas një zëdhënësi të kampit dhe organizatës humanitare Caritas.

Megjithatë, të gjithë kanë shfaqur simptoma si dhimbje koke, ethe dhe të vjella, të cilat lidhen me Ebolën, thanë një zëdhënës i kampit, një baba që ka humbur fëmijën, tre burime humanitare dhe një udhëheqës i shoqërisë civile për Reuters.