IA po bëhet më budallaqe!

Nëse përdorni shpesh mjete të inteligjencës artificiale (AI) si ChatGPT apo Gemini, mund të keni vënë re se ato përmirësohen në disa detyra, por në të tjera duket se bëjnë hapa pas.

Sipas një studimi të publikuar në revistën prestigjioze shkencore Nature, kjo nuk është vetëm përshtypje e përdoruesve.

Hulumtimi tregon se modelet e inteligjencës artificiale mund të bëhen më pak efektive kur trajnohen gjithnjë e më shumë me përmbajtje të krijuar nga modele të tjera AI.

Ky fenomen njihet si “kolapsi i modelit”.

Sipas studiuesve, kur një model mëson nga përmbajtja e gjeneruar artificialisht,ai gradualisht humb aftësinë për të kuptuar shpërndarjen reale të informacionit dhe fillon të harrojë të dhënat e rralla, origjinale dhe inovative.

Si rezultat, përmbajtja bëhet më e zakonshme, më e parashikueshme dhe më pak kreative, shkruan Index, përcjell Klankosova.tv.

Problemi bëhet edhe më i madh pasi interneti po mbushet me tekste, komente, përshkrime produktesh dhe postime në rrjete sociale të krijuara me ndihmën e inteligjencës artificiale.

Nëse kompanitë që zhvillojnë modele të reja AI përdorin këto materiale pa verifikuar origjinën e tyre, ato rrezikojnë të trajnojnë sistemet e ardhshme me përmbajtje të prodhuar nga vetë AI.

Një nga autorët e studimit, Yarin Gal nga University of Oxford, e krahasoi fenomenin me një cikël të dështuar reagimesh: “Sa më shumë që modelet ushqehen me rezultatet e veta, aq më shumë largohen nga realiteti”.

Studiuesit theksojnë se modelet e inteligjencës artificiale kanë tendencë të fokusohen te informacioni më i zakonshëm, ndërsa injorojnë të dhënat më të rralla.

Kjo mund të ndikojë negativisht në kuptimin e sëmundjeve të rralla, gjuhëve më pak të përdorura, ideve të reja shkencore dhe përvojave të grupeve më pak të përfaqësuara në të dhëna.

Eksperimentet e kryera treguan se cilësia e të dhënave të prodhuara nga AI mund të përkeqësohet nga një brez modelesh në tjetrin.

Sipas përmbledhjes së studimit në Nature, përdorimi i pakontrolluar i përmbajtjes së krijuar nga AI në trajnimet e ardhshme mund të shkaktojë “mangësi të pakthyeshme”.

Autorët paralajmërojnë se inteligjenca artificiale mbetet një mjet shumë i dobishëm, por theksojnë se zhvillimi i saj duhet të mbështetet ende në një sasi të konsiderueshme të dhënash të krijuara dhe të verifikuara nga njerëzit.