Mbahet marshi në mbështetje të të mbijetuarve të dhunës seksuale gjatë luftës në Kosovë

Sot në Prishtinë është mbajtur marsh në mbështetje të të mbijetuarve të dhunës seksuale gjatë luftës në Kosovë, me rasti ne zyrtarizimit të 14 prillit si dita e këtyre të mbijetuarve.

Gjatë ditës së sotme u mbajtën edhe fjalime nga dy të mbijetuarat e dhunës seksuale, Vasfije Krasniqi-Goodman dhe Shyhrete Tahiri.

“Marshi filloi nga sheshi ‘Ibrahim Rugova’ dhe vazhdoi deri te heroinat të cilat vazhdimisht flasin dhe janë të parat që publikisht kanë folur për dhunimet e bëra gjatë luftës, Vasfije Krasniqi-Goodman dhe po ashtu Shyhrete Tahiri”, raporton gazetarja e Klan Kosovës, Qëndresë Tërshani.

Ato e kanë parë këtë ditë si historike për to dhe të gjitha gratë e përdhunuara, madje kjo ditë koincidon me atë të 1999-ës kur Krasniqi-Goodman ishte përdhunuar nga forcat serbe.

Në anën tjetër, Tahirit i ka bërë përshtypje prezenca e të rinjve, që sipas saj do ta kujtojnë përjetimin e tyre edhe kur ato të mos jenë më në botë.