Lidhja e Bizneseve të Kosovës ngre alarm: Gjendje kritike e kompanive gurthyese dhe betonjerkave

Lidhja e Bizneseve të Kosovës ka shprehur shqetësim të thellë për gjendjen në të cilën ndodhet sektori minerar në vend, veçanërisht kompanitë gurthyese dhe ato që operojnë në prodhimin e betonit.

Sipas LBK-së, pengesat institucionale të shumta po rrezikojnë seriozisht funksionimin dhe ekzistencën e këtyre ndërmarrjeve, të cilat janë të rëndësishme për ekonominë vendore, transmeton Klankosova.tv.

Sipas Lidhjes së Bizneseve të Kosovës, arsyet kryesore të krizës përfshijnë:

-Mosfunksionimi i bordeve dhe departamenteve përkatëse, që pamundëson lëshimin e lejeve dhe dokumenteve të domosdoshme për operim të ligjshëm;

-Mungesa e mundësisë për pagesë me këste të rentës minerare, ndryshe nga praktikat lehtësuese në sektorë të tjerë;

-Mungesa e platformave të përgjithshme elektronike për raportim, që ndikon negativisht në transparencën dhe efikasitetin operacional;

-Qindra lëndë të bllokuara në Bordin e Minierave, të patrajtuara për muaj të tërë;

-Zvarritja në miratimin e Udhëzimit Administrativ për qiradhënien e tokave pyjore, e cila pengon shfrytëzimin ligjor të pronave publike;

-Vonesa të pajustifikuara nga institucionet komunale dhe ato qendrore, si në dhënien e pëlqimeve ashtu edhe në vazhdimin e projekteve ekzistuese.

Sipas LBK-së,situata është kritike. Në reagimin e tyre, thuhet se  kompanitë kanë investuar miliona euro në pajisje të rënda, janë të ekspozuara ndaj kredive bankare, dhe shumë prej tyre ndodhen në prag të falimentimit. Çdo vonesë e mëtejshme sipas tyre e thellon krizën, duke rrezikuar:

– Vendet e punës;

– Të hyrat buxhetore të shtetit;

– Stabilitetin e sektorit ndërtimor dhe infrastrukturor në vend.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.