Kush u eliminua deri tash nga Kupa e Botës?

Pesë kombëtare kanë humbur zyrtarisht çdo shans për të vazhduar rrugëtimin e tyre në Kupën e Botës 2026, pasi u mposhtën në dy ndeshjet e para të fazës së grupeve.

Ndërsa gara po hyn në momentet vendimtare, disa skuadra tashmë i kanë dhënë lamtumirën turneut, ndërsa të tjerat vazhdojnë betejën për një vend në fazën eliminatore.

Nga 48 kombëtaret pjesëmarrëse në Botërorin e këtij viti, 16 do të eliminohen në përfundim të fazës së grupeve, e cila mbyllet në orët e para të mëngjesit të së dielës (sipas orës britanike).

Deri tani, pesë skuadra që kanë regjistruar humbje në të dyja ndeshjet e para janë eliminuar matematikisht nga turneu.

Në Grupin C, Haiti nuk ka më mundësi për të avancuar pas humbjeve ndaj Skocisë dhe Brazilit. Për haitianët, kjo shënon fundin e një aventure historike, pasi po merrnin pjesë në Kupën e Botës për herë të parë që nga viti 1974.

Turqia është bërë kombëtarja e parë evropiane që eliminohet nga Botërori 2026. Humbjet ndaj Australisë dhe Paraguait i kanë mbyllur çdo rrugë kualifikimi skuadrës turke.

Nga përfaqësueset afrikane, Tunizia është e vetmja që e ka të konfirmuar eliminimin. Ajo ka pësuar dy disfata të rënda, duke u mposhtur me nga katër gola diferencë nga Suedia dhe Japonia.

Edhe Jordania, debutuese në këtë edicion të Kupës së Botës, nuk ka më asnjë mundësi për të kaluar në fazën tjetër, duke u bërë kombëtarja e parë aziatike e eliminuar matematikisht.

Ndërkohë, në Grupin L, ku bën pjesë edhe Anglia, Panamaja është skuadra e pestë që largohet nga gara. Ajo u mposht 1-0 nga Gana dhe më pas nga Kroacia, duke mbetur pa pikë pas dy xhirove të para.

Formati i ri i Kupës së Botës 2026 ka sjellë edhe ndryshime të rëndësishme në kriteret e renditjes. Në rast se dy ose më shumë skuadra e mbyllin fazën e grupeve me numër të barabartë pikësh, përparësi nuk do të ketë më diferenca e golave, por rezultatet në përballjet direkte mes ekipeve të përfshira.