Italia refuzon propozimin për zëvendësimin e Iranit në Kupën e Botës

Italia ka hedhur poshtë kategorikisht një propozim të pazakontë për të marrë pjesë në Kupën e Botës në vend të Iranit, duke i dhënë fund spekulimeve që kanë qarkulluar ditët e fundit.

Ideja u propozua nga Paolo Zampolli, i njohur si bashkëpunëtor i afërt i Donald Trump, i cili argumentoi se një ndryshim i tillë mund të justifikohej për arsye sportive dhe diplomatike. Megjithatë, qëndrimi i FIFA-s mbetet i prerë: nuk do të ketë ndryshime në ekipet pjesëmarrëse dhe Irani është i konfirmuar në turne.

Edhe autoritetet italiane e kanë kundërshtuar menjëherë këtë skenar. Ministri i Sportit, Andrea Abodi, e cilësoi propozimin si “të papërshtatshëm”, duke theksuar se kualifikimi në kompeticione të tilla fitohet vetëm në fushë.

Qëndrimi u mbështet edhe nga Presidenti i Komitetit Olimpik Kombëtar Italian, Luciano Buonfiglio, i cili u shpreh i ofenduar nga sugjerimi. Ndërkohë, Ministri i Ekonomisë dhe Financave, Giancarlo Giorgetti, deklaroi se një veprim i tillë do të ishte i papranueshëm për vendin.

Me këtë reagim të unifikuar, Italia mbyll çdo diskutim mbi një rikthim të mundshëm në Kupën e Botës përmes rrugëve jo sportive.