Irlanda: E pandërgjegjshme nëse Izraeli do të vazhdonte me bombardimet e Rafahut

Ministri i Jashtëm i Irlandës, Micheal Martin, tha se do të ishte “e pandërgjegjshme” nëse Izraeli do të vazhdonte me bombardimet e Rafahut, ku rreth 1.5 milionë njerëz kanë kërkuar strehim nga sulmet në veri dhe në qendër të Gazës.

“Shumica dërrmuese e Këshillit të Punëve të Jashtme të BE-së dëshiron t’i japë fund kësaj lufte të tmerrshme dhe dhunës. Ne ishim shumë të qartë se pengjet duhet të liroheshin dhe është e pandërgjegjshme që ata janë mbajtur kaq gjatë”, tha ai.

“Ne jemi gjithashtu të mendimit se pushtimi i Rafahut ose fillimi i një sulmi në Rafah do të sillte një situatë katastrofike humanitare mbi atë që tashmë është një situatë e tmerrshme humanitare dhe do të ishte e pandërgjegjshme [me] vuajtjet e pabesueshme; vuajtjet e pafundme që po kalojnë familjet me mbi 1.5 milion njerëz të grumbulluar në një cep shumë të vogël të Gazës”, shtoi Martin.

“Bota është e tronditur … në nivelin e çnjerëzimit që po ndodh tani brenda Gazës”.

Irlanda dhe Spanja javën e kaluar i shkruajtën shefes së Komisionit Evropian Ursula von der Leyen duke kërkuar një rishikim të marrëveshjes së asocimit BE-Izrael në lidhje me detyrimet e saj për të drejtat e njeriut.

Martin tha se do të ishte “sfiduese” për të marrë mbështetjen e shteteve të tjera anëtare për letrën.