Irani sulmon me raketa caqe në Irak dhe Siri

Korpusi i Gardës Revolucionare Islamike të Iranit (IRGC) sulmoi me raketa balistike ato që pretendon se ishin “selia e spiunazhit” izraelit në rajonin e Kurdistanit të Irakut dhe gjithashtu goditi objektivat që dyshohet se lidhen me ISIS-in në Sirinë veriore.

Të paktën tetë shpërthime u dëgjuan në Erbil, kryeqyteti i rajonit gjysmë autonom kurd në Irak, herët të martën. Katër persona u vranë dhe gjashtë u plagosën, sipas këshillit rajonal të sigurisë, shkruan Al Jazeera, transmeton Klan Kosova.

“Raketat balistike u përdorën për të shkatërruar qendrat e spiunazhit dhe grumbullimet e grupeve terroriste anti-iraniane në rajon,” tha IRGC, sipas mediave shtetërore.

Qeveria e Irakut dënoi atë që e quajti “agresionin” e Iranit ndaj Erbilit që çoi në viktima civile në zonat e banuara, duke e quajtur atë shkelje të sovranitetit të vendit dhe sigurisë së popullit të tij, sipas një deklarate nga Ministria e Punëve të Jashtme.

Qeveria irakiane thotë se do të ndërmarrë veprime të ndryshme, duke përfshirë paraqitjen e një ankese në Këshillin e Sigurimit të Kombeve të Bashkuara.

IRGC pretendon se kishte shënjestruar selinë e agjencisë izraelite të spiunazhit Mossad në Erbil, njoftoi agjencia iraniane e lajmeve IRNA.