14:57, 24 Janar 2020

Instituti Kombëtar i Shëndetësisë Publike bëri të ditur sot se në Kosovë ende nuk ka të regjistruar ndonjë rast të prekur nga koronavirusi.

Por, mundësia e përhapjes së tij ekziston në çdo vend në rast të kontaktit me burimin e infeksionit siç janë personat që vijnë nga vendet e prekura me këtë virus, njofton Klan Kosova.

Koronavirusi është i rrezikshëm në rast të shfaqjes së komplikimeve të sëmundjes, sidomos për personat me imunodeficiencë dhe sëmundje kronike.

IKSHPK lidhur me pasojat e kësaj sëmundje, ka ndarë edhe masat e parandalimit:

  • Shmangia e kontaktit të ngushtë me njerëzit që vuajnë nga infeksione akute të frymëmarrjes.
  • Larja e shpeshtë e duarve, veçanërisht pas kontaktit të drejtpërdrejtë me njerëzit e sëmurë ose në vendqëndrimin e tyre.
  • Shmangia e prekjes së fytyrës dhe mbulimi i gojës dhe hundës me faculetë, me mëngë ose parakrahë gjatë kollës dhe teshtitjes.
  • Hudhni faculetat e përdorura në shportën më të afërt të mbeturinave.
  • Nëse keni ethe, kollë dhe vështirësi në frymëmarrje kërkoni menjëherë ndihmë mjekësore dhe tregoni historinë eventuale të udhëtimit jashtë vendit.
  • Personat e sëmurë duhet të qëndrojnë në shtëpi në mënyrë që të parandalohet përhapja e sëmundjes.
  • Të evitohen vendet e mbyllura dhe të mbingarkuara me njerëz.
  • Personat të cilët kanë qenë në provincën Wuhan, Kinë brenda 2 javëve të fundit dhe kanë ethe, kollë ose vështirësi në frymëmarrje, duhet menjëherë të kërkojnë ndihmë mjekësore.

 

 

Konkurs Pune

Lexo më shumë