Gjykata: Ramadan Morina dyshohet se mori pjesë në vrasjen e 34 civilëve në Burim të Malishevës

Një muaj paraburgim i është caktuar Ramadan Morinës, i dyshuar për krime të luftës në Kosovë.

Vendimi u mor sot nga Gjykata Themelore e Prishtinës.

Në dosjen e organeve të drejtësisë, thuhet se ekziston dyshimi i bazuar se Morina kishte marrë pjesë në vrasjen e 34 civilëve në fshatin Burim të Malishevës.

“Ekziston dyshimi i bazuar se me datë 31 mars 1999, i pandehuri R.M kishte qenë pjesëmarrës në krimet e kryera në fshatin Burim të Malishevës, po ashtu dyshohet se në të njëjtën datë, kishte marr pjesë edhe në vrasjen e 34 viktimave të këtij fshati”, tha Gjykata.

“Gjykata konstatoj se ekziston dyshimi i bazuar se i pandehuri R.M. nëse gjendet në liri, mund të arratiset duke pasur parasysh faktin se ai ka shtetësinë e Serbisë, ka vendbanimin e përhershëm në Serbi, andaj ka gjasa reale se mund të arratiset dhe i njëjti mund të jetë i pa arritshëm për fazat tjera të procedurës penale, gjithashtu Gjykata konstaton se nëse i pandehuri lihet në liri paraqet rrezik real se i njëjti mund të identifikoj dëshmitarët dhe të ushtroj ndikim tek të njëjtit”, thuhet në njoftimin e Gjykatës Themelore të Prishtinës transmeton Klankosova.tv.

Vërejtje:
Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.