Gjykata e la të lirë, dy muaj më pas kreu sulmin vdekjeprurës në Paradën e Krenarisë në Berlin

Një 21-vjeçar i dënuar për përpjekje për t’iu bashkuar organizatës terroriste ISIS u la i lirë nga gjykata gjermane, pavarësisht se u shpall fajtor dhe u dënua me 22 muaj burg.

Vetëm rreth dy muaj e gjysmë më vonë, ai dyshohet se kreu sulmin vdekjeprurës ndaj Paradës së Krenarisë (CSD) në Berlin, ku humbi jetën një grua nga Polonia dhe u plagosën 29 persona.

Sipas dokumenteve të vendimit gjyqësor, të siguruara nga gazeta gjermane Bild, Abdul Ballout u paraqit më 12 maj para Gjykatës për të Mitur në Berlin, i akuzuar nga Prokuroria e Përgjithshme për terrorizëm. Ai u shpall fajtor pasi kishte udhëtuar në vitin 2025 përmes Turqisë dhe Mauritanisë drejt Libanit me synimin për t’iu bashkuar ISIS-it.

Gjykata e dënoi me 22 muaj burg, duke theksuar se një vepër kaq e rëndë kërkonte dënimin më të ashpër që parashikon ligji për të rinjtë. Megjithatë, në fund të procesit gjyqësor vendosi të mos e dërgonte menjëherë në burg, transmeton Klankosova.tv

Sipas vendimit, nëse Ballout nuk do të kryente vepra të tjera penale gjatë gjashtë muajve pas hyrjes në fuqi të vendimit dhe do të merrte pjesë në një program deradikalizimi, dënimi mund të pezullohej me kusht.

Gjykata arsyetoi vendimin duke theksuar se i pandehuri ishte distancuar nga ISIS gjatë gjykimit dhe se plani i tij për t’iu bashkuar organizatës ishte “diletant”, duke vlerësuar se ai kishte qenë larg krijimit të një rreziku konkret. Gjithashtu, iu morën parasysh gjashtë muajt e paraburgimit në Gjermani dhe tre muajt e kaluar në paraburgim në Liban.

Megjithatë, në vendim përmenden edhe një sërë elementesh që tregonin radikalizimin e tij. Gjykata vlerësoi se Ballout e konsideronte fenë si mbështetjen kryesore të jetës së tij, kishte kaluar nga besimi shiit në atë sunit, gjë që kishte shkaktuar konflikte me familjen, dhe kishte zhvilluar dëshirën për t’iu bashkuar ISIS-it për të luftuar kundër “armiqve të shpallur të Islamit”. Gjithashtu, gjykata theksonte se ai ishte plotësisht i vetëdijshëm për natyrën terroriste të organizatës dhe për ideologjinë e saj ekstremiste, transmeton Klankosova.tv.

Ballout kishte precedentë penalë edhe më herët. Në vitin 2022 ishte dënuar për plagosje dhe grabitje, ndërsa në dokumentet e asaj çështjeje thuhej se ai ndiqte disa herë në javë mësime fetare te imami i tij.

Sipas raportimeve, të shtunën ai dyshohet se kreu sulmin me thikë gjatë Paradës së Krenarisë në Berlin, ku u vra një grua nga Polonia dhe mbetën të plagosur 29 persona, disa prej tyre në gjendje kritike. Të dielën, gjatë përpjekjes së forcave speciale gjermane (SEK) për ta arrestuar, Ballout nxori një armë të ftohtë dhe u qëllua për vdekje nga policia.

Rasti ka hapur debat në Gjermani mbi vendimin e gjykatës për ta lënë të lirë të dënuarin, pavarësisht vlerësimeve të mëparshme për radikalizimin e tij dhe rrezikun që ai mund të paraqiste.