Fundi i një epoke: Neymar zyrtarisht i jep lamtumirën Brazilit

Pas më shumë se një dekade si lideri dhe simboli i Kombëtares së Brazilit, Neymar Jr. ka vendosur t’i japë fund rrugëtimit të tij me fanellën verdhejeshile.

Sulmuesi brazilian ka konfirmuar zyrtarisht tërheqjen nga përfaqësuesja, duke mbyllur një kapitull historik në futbollin e vendit të tij.

Në deklaratën e tij emocionale, Neymar u shpreh:

“Historia ime me Kombëtaren e Brazilit ka përfunduar. Gjithmonë kam luftuar për të mbrojtur ngjyrat e kësaj fanele. Por nuk dua të luaj më.”

Neymar largohet si golashënuesi më i mirë në historinë e Brazilit, me 80 gola në 130 ndeshje, duke lënë pas një trashëgimi të jashtëzakonshme që do të kujtohet gjatë nga tifozët e “Seleçaos”.

Gjatë karrierës së tij me Brazilin, ai fitoi Medaljen e Artë Olimpike në Rio 2016 dhe FIFA Confederations Cup në vitin 2013. Megjithëse ëndrra për të ngritur Kupën e Botës nuk u realizua, Neymar ishte për më shumë se dhjetë vjet figura kryesore e pesë herë kampionëve të botës dhe një nga futbollistët më të talentuar të brezit të tij.

Largimi i 33-vjeçarit shënon fundin e një epoke për Kombëtaren e Brazilit, e cila tashmë do të nisë një kapitull të ri pa njeriun që për vite me radhë mbajti mbi supe barrën e pritshmërive të një kombi të tërë.