Franca ndalon shitjet e iPhone 12, shkak rrezatimi

Franca ka urdhëruar kompaninë Apple të ndalojë shitjen e iPhone 12 për shkak të emetimit të tepërt të rrezatimit elektromagnetik.

Të martën, mbikëqyrësi francez që drejton frekuencat e radios, i tha kësaj kompanie që të rregullonte telefonat ekzistues.

ANFR e ka këshilluar kompaninë që nëse nuk mund ta zgjidhë problemin nëpërmjet një përditësimi të softuerit, duhet të tërheqë çdo iPhone 12 të shitur ndonjëherë në vend, raporton BBC, transmeton Klankosova.tv.

Ndërsa, Organizata Botërore e Shëndetësisë në faqen e saj të internetit tha se nuk ka asnjë provë për të arritur në përfundimin se ekspozimi ndaj fushave elektromagnetike të nivelit të ulët është i dëmshëm për njerëzit.

iPhone 12 u lëshua për herë të parë në shtator 2020 dhe ende shitet në mbarë botën.

Apple i tha BBC-së se po kundërshtonte rishikimin e ANFR-së dhe tha se i kishte ofruar rregullatorit rezultatet laboratorike nga vetë gjigandi i teknologjisë dhe palët e treta, të cilat tregojnë se pajisja është në përputhje me të gjitha rregullat përkatëse.

Kompania shtoi se iPhone 12 u pranua se është në përputhje me rregulloret për nivelet e rrezatimit në mbarë botën. /Klankosova.tv