Epidemia e Ebolës në Kongo, mbi 500 të vdekur

Më shumë se 500 persona kanë vdekur nga shpërthimi i fundit i Ebolës në Republikën Demokratike të Kongos, ndërsa autoritetet shëndetësore raportojnë se numri i rasteve të konfirmuara ka kaluar 1 mijë e 500.

Sipas Ministrisë së Shëndetësisë së Kongos, deri tani janë regjistruar 1,561 raste, prej të cilave 506 kanë përfunduar me fatalitet, që nga shpallja e shpërthimit më 15 maj. Zyrtarët thonë se përhapja e sëmundjes po vazhdon më shpejt se sa reagimi institucional.

Në provincën Ituri, epiqendra e shpërthimit, punëtorët shëndetësorë kanë paralajmëruar grevë 24-orëshe nëse nuk u paguhen benefitet dhe nuk përmirësohen kushtet e punës.

 Ata përfshijnë kryesisht profesionistë shëndetësorë që po punojnë në kushte të vështira, me pushime të kufizuara dhe nën presion të madh, shkruan Abcnews, transmeton Klankosova.tv.

Në një njoftim drejtuar qeverisë, punëtorët kanë deklaruar se nuk kanë marrë pagesat e premtuara që nga fillimi i shpërthimit, si dhe se mungojnë pajisjet dhe furnizimet e nevojshme për punë.

Ata gjithashtu kanë ngritur shqetësime për pagat e ulëta, trajtimin nga ekipet e ardhura nga kryeqyteti Kinshasa, si dhe mungesën e përfshirjes së punëtorëve lokalë në operacionet në Ituri.

Kërcënimi për grevë vjen vetëm disa ditë pas nisjes së regjistrimit për provat klinike, duke rritur shqetësimet për ndikimin e mundshëm në përpjekjet për kontrollimin e shpërthimit.

Autoritetet ende nuk kanë identifikuar pacientin zero dhe po vazhdojnë gjurmimin e mijëra kontakteve të mundshme të të infektuarve.

Po ashtu, mungesa e një vaksine të miratuar për llojin e virusit Bundibugyo po e vështirëson reagimin, ndryshe nga variantet e tjera për të cilat ekzistojnë vaksina.

Organizata Botërore e Shëndetësisë ka deklaruar se muaji i parë i këtij shpërthimi ka qenë më i rëndi i regjistruar ndonjëherë.