Eksperti i sigurisë: Hoti duhet të kërkojë sqarime nga KFOR-i për patrullimin me xhandarmërinë serbe në territor të Kosovës

Eksperti i njohur i fushës së sigurisë, Ramadan Qehaja, ka cilësuar se hyrja e djeshme xhandarmërisë serbe në thellësi të territorit të Kosovës nuk përbën risi.

“Ata në vazhdimësi vijojnë të cenojnë integritetin territorial të Kosovës duke shkaktuar panik të popullata shqiptare e cila gjendet në dy anët e kufirit. Tashmë kemi mbase një pretendim të KFOR-it se dje ishte planifikuar një patrullim i përbashkët. Mirëpo pyetja shtrohet pse do të duhej të bëhej patrullimi në thellësi të territorit të Kosovës e jo në zonë neutrale apo edhe në territorin e Serbisë?”, është shprehur Qehaja, transmeton Klan Kosova.

“Komanda e KFOR-it duhet të jep shpjegim zyrtar për këtë dhe Kryeministri duhet të kërkojë shpjegime për këtë nga Komandanti i KFOR-it”.

Sipas tij institucionet e Kosovës duhet të mendojnë për prezencë të shtuar dhe vendosje statike të policisë kufitare në këtë dhe zona tjera.

“Kujtojmë se Serbia e ka të dislokuar xhandarmërinë vetëm në raport me kufirin me Kosovë e jo edhe me kufijtë të tjerë (atje patrullojnë njësitet e rregullta të policisë kufitare serbe). Formacioni i xhandarmërisë me defilimin dhe provokimin e saj shkakton frikë të qëllimshme dhe mund t’i kontribuojë ndonjë eskalimi të situatës”.

*Klikoni KËTU për t´u bërë pjesë e kanalit zyrtar të Klan Kosovës në Viber.

*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.