Ekskluzive: I arrestuari për incidentin e armatosur në Aktash është familjar i ‘Capave’

Prokuroria Themelore në Prishtinë ka zhvilluar aksion mëngjesin e sotëm në koordinim me Policinë e Kosovës, ku është kryer një urdhër kontroll në një lokacion në lagjen “Bajram Bahtiri” në Prishtinë, lidhur me rastin ‘Sekiraqa-Capat’, ku mbeti i vrarë një person, në shtator 2024, raporton Klankosova.tv.

Si rezultat i bastisjes, është arrestuar një person për veprën penale vrasje e rëndë në tentativë dhe për armëmbajtje pa leje.

Klankosova.tv ka mësuar ekskluzivisht se sipas informacioneve të para, i arrestuari është familjar i ‘Capave’.

Gjatë kontrollit, në vendin e ngjarjes është gjetur dhe sekuestruar një armë zjarri, për të cilën dyshohet se mund të jetë përdorur në kryerjen e veprës penale.

Kujtojmë se familjet Sekiraqa dhe Capat, të njohura edhe si grupe që janë në konflikt qe një kohë, u përfshinë në këtë incident të armatosur, ku u vra një person dhe pesë të tjerë u plagosën.

Nga familja Sekiraqa, kishte mbetur i plagosur personi më me ndikim në grupin e tyre, Salih Sekiraqa, dhe po ashtu edhe Korab Gashi (vëllai i viktimës), Robert Llumnica dhe Valdrin Ademi. /Klankosova.tv

Vërejtje: Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.

Rasti Sekiraqa – Capat: Arrestohet edhe një person për tentim vrasje, bastisje në Prishtinë