Bosnje: Zhytësit vendosin bredhin e stolisur në fund të liqenit (FOTO)

Festat po vijnë… edhe në fund të një liqeni boshnjak.

Një grup veteranësh boshnjakë të luftës, të shndërruar në zhytës dashamirës të natyrës, u takuan në liqenin e tyre të preferuar këtë javë për të vendosur një pemë të Krishtlindjes nën ujë dhe për të përgatitur veten dhe “peshqit” për të festuar festat e ardhshme të dimrit, shkruan AP, transmeton Klan Kosova.

Grupi u zhyt thellë në të ftohtin e liqenit Sicki Kop, pranë qytetit verilindor boshnjak të Tuzlës, për ta vendosur përkohësisht pemën e vogël dhe të dekoruar në florën e tij nënujore.

“Ne morëm pjesë shumë herë në aktivitete të ndryshme për ta mbrojtur këtë liqen, duke përfshirë edhe me mbushjen e tij me peshq. Ky liqen do të thotë shumë për ne”, tha zhytësi Elvir Mahmutoviq.

Ai dhe një grup burrash që pësuan lëndime ose sëmundje që ua ndryshuan jetën si ushtarë në luftën e Bosnjës 1992-95 “zbuluan” liqenin kur bënë zhytje të thella si pjesë e rehabilitimit të tyre të pasluftës.

Liqeni ka ekzistuar vetëm që nga viti 1987, kur një kompani vendase e minierave të qymyrit hoqi dorë nga lufta e saj kundër natyrës dhe braktisi një gropë të madhe që nxirrte qymyr për gati dy dekada, derisa uji i freskët nëntokësor e mbushte atë vazhdimisht.

Në vitin 2000, zhytësit bashkuan forcat me aktivistë të tjerë vendas për ta pastruar liqenin, për të futur peshq dhe për të mbjellë e kujdesur për qindra pemë të reja rreth perimetrit të tij.

Ata gjithashtu iu bashkuan një lufte të gjatë deri tani të suksesshme me kompaninë minerare për të penguar planet e saj për të filluar hedhjen e mbetjeve ndotëse nga operacionet e tjera të saj në vend.

Gjatë rrugëtimit të tyre, ata u bënë si eko-luftëtarë, duke iu bashkuar zhytjeve të pastrimit rreth Bosnjës dhe Ballkanit.

Megjithatë, “liqeni i tyre” – shtëpia e pothuajse 40 për qind e llojeve të amfibëve që gjenden në Bosnje – mbetet vendi i tyre i preferuar për zhytje dhe takim.

“Çdo vit ne organizojmë këtu një konkurs vjetor fotografish nënujore për ta promovuar këtë liqen dhe botën e bukur të fshehur nën sipërfaqen e tij,” thotë zhytësi dhe veterani i luftës, Bilal Sariq.

“Për fund të këtij viti vendosëm një pemë Krishtlindjesh në liqen si një mënyrë për të kurorëzuar punën tonë, veçanërisht në Sicki Kop”, shton ai.

Ideja ishte ta “bëjmë gati veten dhe peshqit” për të festuar festat e ardhshme të dimrit, thotë Amar Jarakoviq, një zhytës i ri që iu bashkua ekipit disa vite më parë, duke ndjekur gjurmët e babait të tij të ndjerë.