Aktivistët e klimës ‘nënvlerësojnë brishtësinë’ e veprave të artit (VIDEO)

Javët e fundit, aktivistët e klimës kanë qenë në fokus të medieve për shkak të protestave që ndërlidhen me pikturat klasike.

Piktura të punuara nga mjeshtrit Van Gogh, Monet, Picasso, Warhol dhe Vermeer janë qëlluar të gjitha me kanoçe me supë nga aktivistët e klimës për të marrë vëmendje, shkruan Euronews, transmeton Klan Kosova.

Shumica e protestuesve kanë qenë të lidhur drejtpërdrejt me thirrjen ‘Just Stop Oil’ dhe kanë argumentuar se protestat e tyre që tërheqin vëmendjen duke zhvlerësuar kryeveprat e artit, zbehen në krahasim me shkatërrimin e planetit.

Në fillim të këtij muaji, dy protestues belgë u dënuan me burgim pasi derdhën supë domatesh mbi “Vajzën me një vath perle” të Johannes Vermeer në Holandë.

BREEK – Meisje met de parel van Johannes Vermeer besmeurd in #Mauritshuis. pic.twitter.com/XzAZTOoBv9

— Steven Bakker (@Kolpen) October 27, 2022

Megjithëse veprimet kanë tërhequr vëmendjen mbarëbotërore ndaj ‘Just Stop Oil’ dhe grupeve të saj evropiane, këto protesta shpesh herë po cilësohen si kontroverse. Ky cilësim vjen nga njerëz të tronditur nga gatishmëria për të dëmtuar veprat e çmuara të artit.

Gjatë gjithë këtyre demonstratave, aktivistët kanë theksuar se në shënjestër kanë qenë vetëm pikturat e mbrojtura me xham. Sipas tyre, synimi nuk ka qenë asnjëherë dëmtimi i përhershëm i veprave të artit.

Sot, një deklaratë e përbashkët e Komunitetit Ndërkombëtar të Muzeve (ICOM), e nënshkruar nga afro njëqind drejtorë të galerive, ka kundërshtuar këtë pretendim.

“Javët e fundit, ka pasur disa sulme ndaj veprave të artit në disa koleksione të muzeve ndërkombëtare. Aktivistët përgjegjës për to nënvlerësojnë rëndë brishtësinë e këtyre objekteve të pazëvendësueshme, të cilat duhet të ruhen si pjesë e trashëgimisë sonë kulturore botërore”, thuhet në deklaratë.

“Meqenëse drejtorët e muzeve janë të frustruar me kujdesin e kushtuar ndaj këtyre veprave, ne jemi tronditur thellë nga rrezikimi i tyre”.

“Muzetë janë vende ku njerëzit nga një larmi prejardhjesh mund të angazhohen në dialog dhe që për këtë arsye mundësojnë diskursin shoqëror. Në këtë kuptim, detyrat kryesore të muzeut si institucion – mbledhja, kërkimi, ndarja dhe ruajtja – janë tani më të rëndësishme se kurrë. Ne do të vazhdojmë të avokojmë për qasje të drejtpërdrejtë në trashëgiminë tonë kulturore. Dhe ne do ta ruajmë muzeun si një hapësirë ​​të lirë për komunikim social”, përfundon deklarata.

ICOM ka publikuar të njëjtën deklaratë në frëngjisht dhe spanjisht.

Nënshkruesit e letrës përfshijnë Muzeun Met dhe Guggenheim në Nju Jork, Luvrin dhe Musée d’Orsay në Paris, Prado në Madrid, Galerinë Kombëtare dhe Muzeun Britanik në Londër dhe Galerinë Berlinsche në Berlin.

klankosova.tv