Një predhë e paidentifikuar shpërthen në Poloni, derisa Rusia nis një sulm të gjerë ndaj Ukrainës

Një objekt i paidentifikuar u rrëzua në një fshat polak rreth 95 kilometra (60 milje) nga kufiri ukrainas të enjten herët, duke shkaktuar një shpërthim, thanë autoritetet polake, ndërsa Rusia nisi sulme vdekjeprurëse me rreze të gjatë veprimi në të gjithë Ukrainën.

Projekti u rrëzua pranë fshatit Tarnawa-Kolonia në provincën Lublin, tha ushtria polake, kurse policia  tha se banorët raportuan se dëgjuan një shpërthim të fuqishëm.

Polonia kishte ngritur më parë avionë luftarakë në përgjigje të sulmeve ruse ndaj Ukrainës, të cilat goditën pjesë të mëdha të vendit dhe vranë të paktën shtatë persona, përfshirë fëmijë, dhe lanë disa të bllokuar nën rrënoja.

Sulmi i natës ndodhi një ditë pasi presidenti ukrainas, Volodymyr Zelensky u takua me presidentin e SHBA-së, Donald Trump në Shtëpinë e Bardhë dhe i kërkoi atij t’i siguronte Ukrainës sisteme shtesë të mbrojtjes ajrore.

Ministria ruse e Mbrojtjes njoftoi të enjten, përmes një deklarate në Telegram, se kishte kryer një “goditje masive me armë precize me rreze të gjatë veprimi nga toka, ajri dhe deti”, si dhe me dronë sulmues, kundër objekteve ushtarake në mbarë Ukrainën.

Sulmet, të cilat ndodhin në një kohë kur Ukraina ka regjistruar numrin më të lartë të viktimave civile brenda një muaji që nga fillimi i pushtimit rus në shkallë të plotë në vitin 2022, shkaktuan vdekjen e të paktën një personi në kryeqytetin Kiev, sipas autoriteteve vendase.

Në qytetin jugor ukrainas, Kryvyi Rih, gjashtë persona humbën jetën pasi një raketë balistike goditi një shtëpi ku jetonte një familje e madhe, njoftoi në Telegram, Oleksandr Vilkul, kreu i administratës ushtarake të qytetit. Mes viktimave ishin dy vajza të moshës 5 dhe 12 vjeç, tha ai, duke e cilësuar këtë si një “natë të errët”.

Të paktën tetë persona të tjerë mbetën të plagosur, tha Vilkul, duke shtuar se numri i viktimave mund të rritet ndërsa ekipet e emergjencës punojnë për të pastruar rrënojat.

Ekipet e shpëtimit po përpiqeshin gjithashtu të shpëtonin njerëz të bllokuar nën rrënoja pas një sulmi në Lviv, pranë kufirit me Poloninë, sipas kryetarit të bashkisë së qytetit, Andriy Sadovyi. Më shumë se një duzinë personash u plagosën, sipas kreut të administratës ushtarake të Lvivit.

Forcat Ajrore të Ukrainës paralajmëruan se Rusia kishte lëshuar valë raketash, në një njoftim alarmi për banorët herët të enjten, sipas kohës lokale.

Videot e publikuara në rrjetet sociale tregonin familje që strehoheshin në stacionet e mbipopulluara të metrosë së Kievit; disa prej tyre flinin në dysheme, të mbuluara me batanije ose brenda tendave të vogla.

Disa nga skenat më të rënda pas sulmit të së enjtes u regjistruan në Kryvyi Rih, vendlindjen e Zelenskyt.

Një video tronditëse nga fshati fqinj, Radushne, tregonte trupa të shpërndarë mes rrënojave të një ndërtese të shkatërruar, ndërsa zjarret vazhdonin të digjeshin.

Disa orë para sulmit, Zelensky tha se kishte marrë një raport nga forcat e tij ajrore se Rusia po përgatiste një “sulm masiv” ndaj të gjitha rajoneve të vendit.

Gjithashtu të enjten, një magazinë e shitësit me pakicë rus “Wildberries” në qytetin perëndimor të Penzës u përfshi nga flakët pas një sulmi me dron ukrainas, njoftoi në Telegram guvernatori rajonal, Oleg Melnichenko. Një person mbeti i plagosur dhe rreth 200 të tjerë u evakuuan nga vendngjarja, tha Melnichenko.

Ukraina ka shënjestruar vazhdimisht qendrat e shpërndarjes së “Wildberries” – e cila konsiderohet si ekuivalenti rus i “Amazon”-it – duke e sjellë luftën e Moskës edhe më pranë popullatës vendase dhe duke cenuar jetën e përditshme e mjetet e jetesës së rusëve të zakonshëm.

Kievi ka pretenduar se objektet e “Wildberries” janë objektiva legjitime ushtarake, pasi ato furnizojnë trupat ruse në vijën e frontit në Ukrainë – pretendim që Moska e mohon.