Mjekët i dhanë vetëm 3 vite jetë, por nëna sfidoi kancerin agresiv

Një nënë ka arritur të tejkalojë parashikimin e rëndë të mjekëve, pasi fillimisht iu tha se kishte vetëm tre vite jetë për shkak të një diagnoze agresive të kancerit të gjirit. Por së fundmi, mjekët kanë bërë të ditur se nuk ka më dëshmi të sëmundjes në trupin e saj.

Claire Webb ishte vetëm 32-vjeçe dhe po kujdesej për djalin e saj dyvjeçar, Teddy, kur mori lajmin tronditës. Gjithçka nisi pas një incidenti të zakonshëm në një qendër lojërash për fëmijë, ku një goditje në gjoks i shkaktoi një ënjtje të pazakontë, shkruan Mirror, transmeton Klankosova.tv.

Pas disa analizave dhe ekzaminimeve, Claire u diagnostikua me kancer gjiri të fazës së katërt, i cilësuar nga mjekët si “shumë agresiv”.

Përveç diagnozës së rëndë, asaj iu tha se mund të mos arrinte ta shihte të birin të fillonte shkollën pas tre vitesh.

“Më shkatërroi plotësisht. Hyra në një proces zie për jetën që mendoja se do ta kisha”, ka treguar Claire, e cila punon si menaxhere ekipi në kompaninë National Grid në Worcester.

Ajo tha se kishte menduar për të ardhmen me familjen e saj, për fëmijët që shpresonte t’i rriste dhe për planet që kishte me bashkëshortin për vitet e ardhshme.

Claire nuk kishte dyshuar se diçka nuk ishte në rregull deri në prill të vitit 2023. Ajo tregoi se pas goditjes në gjoks, brenda disa orësh kishte vërejtur ënjtje dhe një masë të fortë në pjesën e sipërme të gjirit.

“Mendova se kishte lidhje me ushqyerjen me gji të djalit tim. Kanceri as që më kishte shkuar në mendje”, rrëfeu ajo.

Pesë ditë pas incidentit, Claire u vizitua te mjeku dhe u dërgua për ekzaminime urgjente. Për shkak të historisë familjare me kancer gjiri, ajo u kontrollua më tej dhe vetëm 17 ditë pas ngjarjes u vendos diagnoza.

Një biopsi konfirmoi praninë e kancerit, ndërsa ekzaminimet e mëtejshme zbuluan se sëmundja ishte përhapur edhe në mushkëri.

Megjithatë, pas trajtimeve të shumta, Claire ka arritur një rezultat që dikur dukej i pamundur. Mjekët kanë bërë të ditur se aktualisht nuk ka prova që sëmundja vazhdon të jetë aktive.

Rasti i saj është kthyer në një histori shprese për shumë persona që përballen me diagnoza të rënda, ndërsa Claire vazhdon të jetojë jetën që dikur kishte frikë se nuk do ta shihte, transmeton Klankosova.tv.