BE nis iniciativën për ndihmë prej 1 miliard eurosh për rindërtimin e Gazës

Bashkimi Evropian dhe më shumë se një duzinë vendesh kanë nisur një iniciativë për të siguruar 883.6 milionë euro (rreth 1 miliard dollarë) ndihmë për projektet e rimëkëmbjes së Gazës pas luftës.

Territori i vogël bregdetar vazhdon të jetë i shkatërruar më shumë se dy vjet e gjysmë pas nisjes së konfliktit, i cili u shkaktua nga sulmi i tetorit 2023 ndaj Izraelit nga grupi palestinez Hamas.

Një armëpushim i brishtë është në fuqi që nga tetori i vitit të kaluar, ndërsa Kombet e Bashkuara kanë vlerësuar se rindërtimi i Gazës do të kushtojë rreth 70 miliardë dollarë.

Iniciativa e quajtur “Team Gaza”, e prezantuar në një takim të donatorëve në Bruksel, do të mbështesë projekte për rikthimin e furnizimit me ujë dhe kanalizimeve, largimin e rrënojave dhe rindërtimin e sistemeve shëndetësore, shkruan Reuters, transmeton Klankosova.tv.

Në këtë nismë marrin pjesë Spanja, Danimarka, Britania e Madhe, Gjermania, Norvegjia, Finlanda, Italia, Holanda, Franca, Japonia, Zvicra, Suedia dhe Belgjika, si dhe Banka Botërore dhe Banka Evropiane e Investimeve.

Australia dhe Kanadaja pritet t’i bashkohen gjithashtu.

“Objektivi ynë është i qartë: të ndihmojmë në ndërtimin e shpresës, qëndrueshmërisë dhe një të ardhmeje më të mirë për popullin palestinez”, tha komisionerja evropiane për Mesdheun, Dubravka Suica.