Arsenali përgatit 100 milionë euro për transferimin e Yildizit

Arsenali po përgatit një lëvizje të madhe në afatin kalimtar të verës, me klubin londinez që raportohet se është i gatshëm të ofrojë deri në 100 milionë euro për talentin turk të Juventusit, Kenan Yildiz.

Sipas raportimeve të gazetarit Sacha Tavolieri, drejtuesit e klubit anglez e shohin 20-vjeçarin si përforcimin ideal për repartin ofensiv, ndërsa trajneri Mikel Arteta e ka identifikuar atë si profilin e duhur për krahun e majtë të sulmit para nisjes së sezonit të ri, transmeton Klankosova.tv.

Yildiz konsiderohet një nga talentet më premtues në futbollin evropian. Aftësia e tij për të luajtur në disa pozita sulmuese, për të depërtuar drejt qendrës dhe për të krijuar rrezik të vazhdueshëm pranë zonës kundërshtare e kanë bërë një nga lojtarët më të kërkuar në treg.

Arsenali e sheh yllin turk jo vetëm si një investim për të tashmen, por edhe si një projekt afatgjatë. Arteta synon të shtojë konkurrencën dhe kreativitetin në fazën ofensive, ndërsa Yildiz vlerësohet si një futbollist me potencial të jashtëzakonshëm për t’u shndërruar në një prej emrave më të rëndësishëm të Premier League në vitet e ardhshme.

Megjithatë, transferimi i tij në “Emirates Stadium” nuk pritet të jetë aspak i lehtë, Juventusi vazhdon ta konsiderojë Yildizin një nga asetet më të vlefshme të klubit dhe pjesë thelbësore të projektit afatgjatë në Torino.

“Topçinjtë” synojnë të vazhdojnë ngritjen e tyre drejt elitës së futbollit evropian dhe po kërkojnë futbollistë që mund të bëjnë diferencën në ndeshjet më të rëndësishme të sezonit.

Mbetet të shihet nëse oferta e mundshme prej 100 milionë eurosh do të jetë e mjaftueshme për të lëkundur qëndrimin e Juventusit dhe për të hapur negociatat për një nga talentet më të kërkuar të futbollit evropian.