Ukraina godet anije mallrash dhe pranon shpërthimin e dronit në Rumani

Ukraina ka deklaruar se ka goditur pesë anije që transportonin ngarkesa të paligjshme në Detin e Azovit dhe në ujërat bregdetare të territoreve të pushtuara nga Rusia.

Sipas komandantit të forcave të dronëve ukrainas, këto anije ishin të përfshira në “vjedhjen” e grurit ukrainas, si dhe në transportimin e ngarkesave ushtarake dhe karburantit.

Sulmet vijnë në një kohë kur presidenti rus Vladimir Putin po përgatitet të flasë në një ngjarje të madhe ekonomike në Shën Petersburg, si dhe një ditë pas ofertës së presidentit ukrainas Volodymyr Zelensky për bisedime të drejtpërdrejta me liderin rus për t’i dhënë fund luftës.

Ndërkohë, Ukraina ka konfirmuar se një nga dronët e saj detarë ka shpërthyer pranë brigjeve të Rumanisë të premten, pa raportime për të lënduar, shkruan BBC, transmeton Klankosova.tv.

Nuk është e qartë nëse sulmet ndaj anijeve të ngarkesave të pretenduara nga Kievi lidhen me vdekjen e pesë shtetasve të Azerbajxhanit, të cilët sipas Ministrisë së Jashtme të vendit u vranë gjatë sulmeve me dron në anije në det.

Ministria e Jashtme e Azerbajxhanit tha se dy anije mallrash, “Natra” dhe “Zirkon”, u sulmuan me dronë gjatë natës në zonën e Gjirit të Taganrogut në Detin e Azovit.

Në deklaratë nuk u specifikua se kush qëndron pas sulmeve, por u theksua se anijet nuk i përkasin Azerbajxhanit.

Rusia ka fajësuar Ukrainën për sulmet, ndërsa Kievi nuk ka reaguar menjëherë ndaj këtyre akuzave.