OKB: Lufta në Iran po i shtyn miliona njerëz drejt urisë akute

Miliona njerëz po përballen me vështirësi për të siguruar ushqimin bazë dhe, në disa raste, po shtyhen drejt një urie të thellë për shkak të luftës në Iran, ka njoftuar sot Programi Botëror i Ushqimit (WFP) i Kombeve të Bashkuara.

Në mars, WFP parashikoi se 45 milionë njerëz mund të bien në pasiguri ushqimore të thellë nëse konflikti në Lindjen e Mesme do të vazhdonte të rrisë çmimet e naftës.

Sipas raportit të ri të WFP-së, ky skenar po realizohet tashmë, raporton CNN, transmeton Klankosova.tv.

Raporti i publikuar sot, që shqyrton ndikimin e krizës në disa nga vendet më të cenueshme të botës, zbuloi se 2.5 milionë persona në Somali, 1.3 milionë në Sri Lanka dhe 2.3 milionë në Afganistan “po përballen me vështirësi për të përmbushur nevojat bazë ushqimore dhe, në disa raste, po shtyhen drejt uri të thellë për shkak të krizës.”

Jean-Martin Bauer, drejtori i shërbimit për analizën e sigurisë ushqimore dhe ushqyerjes në WFP, tha se paralajmërimet e hershme kanë rëndësi vetëm “nëse bota vepron mbi to.”

“Ne paralajmëruam se kjo krizë mund të shtyjë miliona njerëz të tjerë drejt urisë; tani po e shohim të ndodhë në kohë reale. Në shumë raste, familjet më të varfra në botë, larg qendrës së krizës, janë ata që po preken më rëndë,” tha Bauer.

WFP paralajmëron se efektet shkatërruese të luftës pritet të thellohen në muajt në vijim, edhe nëse kriza në Lindjen e Mesme zbutet.