Trafiku Urban vazhdon grevën deri në shlyerjen totale të borxheve (VIDEO)

Kryetari i sindikatës së Trafikut Urban në Prishtinë, Ilmi Gashi, ka bërë të ditur se protesta e transportuesve publikë dhe privatë do të vazhdojë edhe sot me fillim nga ora 10:00.

Në emisionin “Fol me Arin”, Gashi tha se tani po pritet alokimi i mjeteve financiare, pas vendimit të Kuvendit Komunal për bartjen e të hyrave vetanake të vitit 2024 në vitin 2025, transmeton Klankosova.tv.

Po ashtu, ai iu kërkoi falje të gjithë qytetarëve të Prishtinës që shfrytëzojnë shërbimet e tyre.

“Fillimisht detyrohem të iu kërkoj falje pasagjerëve të Prishtinës të cilët i shfrytëzojnë shërbimet tona. Është bërë një javë që kemi hyrë në protestë për shkaqe tona, dhe jo për shkak të pasagjerëve”.

“Protesta fillon nga ora 10:00, pra vazhdon edhe sot. Presim alokimin e mjeteve për vendimin që e kanë marrë Kuvendi Komunal, për bartjen e të hyrave vetanake të vitit 2024 në vitin 2025”, tha Gashi.

Pos tjerash, Gashi tha se borxhi i komunës ndaj Trafikut Urban është afro 2 milionë euro.

“Borxhi i komunës ndaj neve është 1 milion e 800 mijë euro”, tha ai.