Turqia nënshkruan marrëveshje me Britaninë për blerjen e 20 avionëve luftarakë

Turqia dhe Mbretëria e Bashkuar nënshkruan të hënën një marrëveshje me vlerë 8 miliardë paund (rreth 9 miliardë euro) për 20 avionë luftarakë Eurofighter Typhoon.

Marrëveshja për të rritur aftësitë ajrore të Turqisë u nënshkrua në Ankara gjatë vizitës së parë të kryeministrit britanik, Keir Starmer në vend dhe shënon porosinë e parë të re të Typhoon-ëve të Mbretërisë së Bashkuar që nga viti 2017, transmeton Klankosova.tv 

“Vendet tona mund të jenë në të dyja anët e Evropës, por ne jemi partnerë të fortë, duke punuar më ngushtë së bashku tani se kurrë më parë”, tha Starmer gjatë një ceremonie nënshkrimi së bashku me Presidentin turk, Rexhep Tajip Erdogan.

“Kjo do të forcojë sigurinë në të gjithë NATO-n, do të thellojë bashkëpunimin tonë dypalësh në mbrojtje dhe do të nxisë rritjen ekonomike këtu dhe në Mbretërinë e Bashkuar, duke siguruar 20,000 vende pune britanike”, shtoi Starmer.

“Jam krenar që tajfunët britanikë do të formojnë një pjesë jetësore të Forcave Ajrore Turke për shumë vite që do të vijnë”, përfundoi ai. /Klankosova.tv