Chelsea dominon dhe fiton bindshëm ndaj Nottingham Forestit në “City Ground”

Chelsea ka marrë një fitore të rëndësishme në kuadër të xhiros së 8-të të Premier Ligës angleze, duke mposhtur Nottingham Forestin me rezultat të pastër 3-0 në ndeshjen e zhvilluar të shtunën pasdite në “City Ground”.

Pas një pjesë të parë të barabartë dhe pa gola, londinezët shpërthyen në 45 minutat e dytë, duke dëshmuar forcën dhe efikasitetin e tyre në fazën ofensive.

Josh Acheampong zhbllokoi rezultatin në minutën e 49-të pas një krosimi perfekt nga Pedro Neto, i cili pak më vonë (minuta e 52-të) dyfishoi vetë epërsinë me një goditje të lirë të ekzekutuar mjeshtërisht. Rezultatin përfundimtar e vulosi Reece James në minutën e 84-të, duke shënuar golin e tretë për Chelsean.

Megjithëse “Blutë” mbyllën ndeshjen me 10 lojtarë, pas përjashtimit të Malo Gustos në minutën e 87-të, ata ruajtën epërsinë dhe arkëtuan tre pikë të vlefshme në garën për zonën e sipërme të tabelës.

Nottingham Forest vazhdon krizën e rezultateve dhe presioni ndaj trajnerit Ange Postecoglou po rritet ndjeshëm, pasi skuadra e tij ende nuk ka regjistruar fitore këtë sezon.

Chelsea do të kërkojë ta vazhdojë serinë pozitive në ndeshjen e radhës ndaj Brentfordit, ndërsa Forest do të përpiqet të rikthehet në binarë në përballjen e ardhshme me Bournemouthin. /Klankosova.tv