Trump nuk pranon të deklarohet nëse SHBA po shqyrton vendosjen e sanksioneve të reja ndaj Rusisë

Presidenti amerikan Donald Trump ka thënë se është “i pakënaqur” me sulmet vdekjeprurëse ruse në Kiev dhe se presidenti Vladimir Putin duhet të “ndalojë”.

“Jo të nevojshme dhe në kohën më të keqe të mundshme. Vladimir, NDALO!” shkroi ai në një postim në Truth Social, duke shtuar: “Le ta përfundojmë MARRËVESHJEN E PAQES!”, raporton BBC, transmeton Klankosova.tv.

Sulmet gjatë natës vranë të paktën tetë persona dhe plagosën 77 të tjerë, sipas zyrtarëve lokalë.

Më vonë të enjten, Trump nuk pranoi të thotë nëse SHBA po shqyrton vendosjen e sanksioneve të reja ndaj Rusisë, por paralajmëroi se “gjëra do të ndodhin” nëse bombardimet nuk ndalen.

Trump tha gjithashtu se nuk ka “asnjë aleancë” me asnjërën palë, por është i përqendruar në përfundimin e konfliktit.

Më herët, presidenti i Ukrainës, Volodymyr Zelensky, tha se SHBA-ja mund të jetë më e vendosur ndaj Rusisë për të siguruar një armëpushim.

“Ne besojmë se nëse ushtrohet më shumë presion ndaj Rusisë, do të mund të afrohemi më shumë në qëndrimet tona,” u tha Zelensky gazetarëve gjatë një vizite në Afrikën e Jugut.

I pyetur nëse do të ishte i gatshëm të bënte ndonjë lëshim, Zelensky tha se fakti që Ukraina është e gatshme të negociojë me Rusinë përbën një “kompromis të madh” dhe se “armëpushimi duhet të jetë hapi i parë”.

Zelensky ndërpreu vizitën e tij në Afrikën e Jugut pas sulmit ndaj Kievit, të cilin e quajti “pa dyshim një nga më të vështirët dhe më të pacipët”.