Padrejtësi ndaj ndërtimtarëve nga komunat: Përfaqësuesi ngre alarmin për favorizime (VIDEO)

Objekte të shumta kolektive kanë dalë si kërpudha pas shiut anë e mbanë Kosovës.

Çmimi për blerjen e tyre shpesh vlerësohet se është mbi vlerën reale të kostos së jetesës në Kosovë, raporton Kiks Kosova.

E përveç çmimit të lartë, një gjë tjetër shqetësuese është fakti se shumicës prej tyre u mungon legalizimi, gjë që e pamundëson që të dihet pronari i saktë i apartamentit.

Por pavarësisht kësaj mungese, kërkesat për legalizim të këtyre objekteve banesore janë me bollëk.

Por aprovimet janë të pakta në numër, sipas asaj që thonë përfaqësuesit e kompanive që merren me ndërtime në Kosovës.

Faton Hoxha është një nga anëtarët e Shoqatës së Ndërtimtarëve të Kosovës, dhe sipas tij, ligji i ndërtimit i aprovuar më 2012 ka precizuar saktë kohën e pritjes së legalizimit nga ana e komunës.

Ligji thotë se koha e pritjes për legalizim është 45 ditë, por që tejkalimet janë të mëdha ndërsa thuhet se ka raste që ka shkuar deri në 8 vite.

Hoxha thotë se në kryeqytet problemi qëndron te vëllimi i madh i kërkesave dhe numri i vogël i inspektorëve.