Grenelli telefonon Trumpin, amerikanët që u liruan nga Venezuela e falënderojnë atë (VIDEO)

Venezuela i ka liruar gjashtë të burgosur amerikanë, pas negociatave që zhvilloi Richard Grenell, me presidentin venezuelian Nikolas Maduro.

Gjashtë të burgosurit e kanë falënderuar presidentin Donald Trump pasi janë liruar.

Në pamje të publikuara në rrjete sociale, shihen ata duke biseduar me Trumpin në telefonin e emisarit për misione speciale, Grenell, derisa janë në aeroplan në kthim për në ShBA.

“Faleminderit shumë president Trump”, tha njëri nga të burgosurit.

Ndërsa tjetri u shpreh: “Faleminderit shumë, kjo është e mrekullueshme nuk mund ta besojmë”.

Ndërsa të gjithë së bashku, amerikanët e liruar thanë: “Të duam shumë, Trump”.

@sharpie_10.0

♬ original sound – Sharpie_10.0

Më herët, Shtëpia e Bardhë i kishte bërë thirrje Venezuelës që të lironte ata që i quajti “pengje amerikane” – si dhe të pajtohej e të pranonte kriminelët venezuelianë të dëbuar nga ShBA-ja, ose të përballej me pasoja.

Të paktën nëntë persona me nënshtetësi amerikane besohet të jenë në mesin e mbi 2,200 të arrestuarve nga autoritetet venezueliane pas protestave mbarëkombëtare mbi rezultatet e kontestuara të zgjedhjeve të korrikut 2024, në të cilat Nicolas Maduro pretendoi fitoren.

Rizgjedhja e tij u refuzua gjerësisht nga opozita dhe komuniteti ndërkombëtar, përfshirë ShBA-në. Ai u betua për mandatin e tij të tretë muajin e kaluar.

Trump i përshëndeti të liruarit në një postim të veçantë, duke thënë se Grenelli po i sillte të gjashtit “në shtëpi nga Venezuela”.

Mediat shtetërore të Venezuelës thanë se diskutimet me të dërguarin e Presidentit Trump kishin qenë të respektueshme, shkruan BBC, transmeton Klankosova.tv.