Bota e artit humbi Buqen – Lamtumirë regjisore!

Bota e artit kosovar sot humbi një personazh të dashur, regjisoren Burbuqe Berisha.

Dy kolege të saj, që ishin edhe mike shumë të afërta, e kanë kujtuar si person të buzëqeshur, të dashur dhe punëtore.

Në një prononcim për Klankosova.tv, deputetja dhe aktorja e njohur shqiptare, Adriana Matoshi tha se për herë të fundit e takoi Burbuqen në premierën e filmit “Zgjoi”.

“Më datë 22 të këtij muaji e pashë në premierën e filmit “Zgjoi”. Si gjithnjë, Buqja e njëjtë e buzëqeshur. Edhe pse të gjithë e kemi ditur që është e sëmurë që një kohë të gjatë, për as edhe një moment nuk ka folur dhe nuk e ka ngarkuar askënd”, tha Matoshi.

Edhe një tjetër aktore me karrierë të gjatë dhe shumë e dashur për publikun shqiptar, Anisa Ismaili tha për Klankosova.tv, se Buqja ka qenë tepër punëtore, dhe e gatshme për ta ndihmuar çdokënd.

“E dashur, e mirë, tepër punëtore, tepër e gatshme të ndihmojë në çdo aspekt artistët e rinj. Dhe deri në frymën e saj të fundit, ajo ishte duke punuar. E kishin angazhuar edhe si regjisore për inaugurimin e Operës. Çdo herë duke punuar, edhe pse me gjendje të rëndë shëndetësore”, tha Ismaili.

Për katër vjet me radhë, Berisha ishte drejtoreshë e Përgjithshme e Teatrit Kombëtar të Kosovës dhe anëtare e Këshillit Drejtues të QKK-së si dhe të Ansamblit “Shota”, ndërsa në vitin 2017 kryetare e këshillit drejtues të TKK-së.

Viteve të fundit, regjisorja ishte drejtoreshë artistike e festivalit “Prishtina Internacional Theater Festival.

Veç kësaj, Buqja njihej si regjisore e suksesshme, pasi ka krijuar shumë filma të metrazhit të shkurtër dhe të gjatë, dokumentarë, seriale televizive e shfaqje në teatër. Ajo pati fituar çmime në disa festivale të filmit dhe teatrit me karakter ndërkombëtar, ndërsa në vitin 2019 u shpall fituese e çmimit kombëtar për kinematografi.

Burbuqe Berisha vdiq sot në hapësirat e Ministrisë së Kulturës, Rinisë dhe Sportit, në moshën 51 vjeçare.

Lamumtirë Buqe, shpirti yt u prehtë në paqe!

www.klankosova.tv