Koronavirusi, rastet e konfirmuara globale kalojnë mbi 1 milion

Më shumë se një milion raste me koronavirus janë regjistruar në gjithë botën, bazuar në shifrat e fundit nga Universiteti Johns Hopkins – një tjetër rekord historik i zi, derisa bota po përballet me përhapjen e pandemisë.

Më shumë se 51,000 njerëz kanë vdekur dhe më shumë se 208,000 janë shëruar, gjithmonë sipas shifrave të këtij universiteti që mbledh të dhëna nga e gjithë bota.

Deri tani: SHBA-ja prin me numrin e rasteve me Covid-19, derisa Italia ka numrin më të lartë të vdekjeve, transmeton Klan Kosova.

Covid-19 fillimisht shpërtheu në Kinë, tre muaj më parë.

Megjithëse të dhënat e Johns Hopkins tregojnë për një milion raste të konfirmuara, shifra mendohet të jetë akoma më e lartë.

U deshën një muaj e gjysmë që 100,000 rastet e para të regjistroheshin. Një milion u arrit pas një dyfishimi të rasteve gjatë javës së kaluar.

Pothuajse një e katërta e rasteve janë regjistruar në Shtetet e Bashkuara të Amerikës, ndërsa Europa përbën rreth gjysmën.