Zelensky thotë se SHBA-ja do ‘zonë të posaçme ekonomike’ dhe tërheqje nga Donetsku

SHBA-ja ka propozuar që Ukraina të tërhiqet nga rajoni lindor i Donetskut dhe të krijojë një “zonë të posaçme ekonomike” në zonat që kontrollon aktualisht.

Kështu tha presidenti ukrainas Volodymyr Zelensky i cili shtoi se territori dhe kontrolli i termocentralit bërthamor Zaporizhzhia mbeten dy çështjet kryesore të pazgjidhura në propozimin e planit të paqes për Ukrainën.

Në një takim informues për gazetarët, Zelensky iu drejtua dëshirës së SHBA-së për një përfundim të shpejtë të konfliktit, natyrës komplekse të negociatave në vazhdim dhe bindjes së tij se Rusia nuk kishte dëshirë të ndalonte luftën.

Ukraina i ka dërguar SHBA-së një plan të përditësuar me 20 pika plus dokumente të veçanta mbi garancitë e sigurisë dhe dispozitat për rindërtimin e Ukrainës, tha Zelensky.

Kjo vjen pas disa javësh aktiviteti diplomatik të nivelit të lartë, i cili ka parë disa plane paqeje të hartuara, të përshtatura dhe të rishikuara nga SHBA-të, Ukraina, Rusia dhe udhëheqësit evropianë.

“Kilometra e fundit është më e vështira. Gjithçka mund të shembet për shumë arsye,” tha Zelensky të enjten.

Rusia kërkon që Ukraina të heqë dorë nga kontrolli i afërsisht 30% të rajonit lindor të Donetskut që ende e mban – diçka që Ukraina ka refuzuar ta bëjë, si në parim, ashtu edhe sepse ka frikë se kjo do t’i lejonte Moskës një pikëmbështetje për pushtime të ardhshme.